नेपाल राष्ट्र बैंकका अनुसार विदेशी विनिमय सञ्चिति जेठ मसान्तसम्म १४ खर्ब ८० अर्ब ८७ करोड रुपैयाँ पुगेको छ । वैशाख मसान्तसम्म विदेशी विनिमय सञ्चिति १४ खर्ब ७० अर्ब ३३ करोड रुपैयाँ रहेको थियो ।

नेपाल राष्ट्र बैंकका अनुसार जेठसम्म रहेको विदेशी मुद्राको सञ्चितिले ९.६ महिनाको वस्तु तथा सेवा आयात धान्न पर्याप्त हुनेछ । यो मुद्राले ११.२ महिनाको वस्तु आयात धान्न सक्ने क्षमता राख्छ । नेपाल राष्ट्र बैंकका अनुसार यो अवस्था बाह्य क्षेत्र व्यवस्थापनमा ‘सहज’ मानिन्छ ।

असार २१ देखि खुला भएको आईएमई लाइफ इन्स्योरेन्सले निष्काशन तथा बिक्रीको आईपीओमा आबेदन आज पाच बजे सम्म मात्र दिन सकिनेछ ।
कम्पनीले यसअघि वैदेशिक रोजगारीमा गएका नेपालीहरुका लागि आइपीओ निष्कासन गरीसकेको छ । जारी पुँजी ४ अर्ब रुपैयाँको ३० प्रतिशतले हुन आउने १ अर्ब २० करोड रुपैयाँ बराबरको आइपीओ जारी गर्न लागेको हो ।

कम्पनीले प्रतिकित्ता १३६ रुपैयाँ ९१ पैसा प्रिमियम थप गरेर २३६ रुपैयाँ ९१ पैसाका दरमा १ करोड २० लाख कित्ता आइपीओ बिक्रीमा ल्याएको हो ।

जसमध्ये १० प्रतिशत अर्थात् १२ लाख कित्ता सेयर वैदेशिक रोजगारीमा रहेका नेपालीहरुलाई निष्कासन भइसकेको छ । त्यस्तै, ५ प्रतिशत अर्थात् ६ लाख कित्ता सेयर कर्मचारी र ५ प्रतिशत अर्थात् ६ लाख कित्ता सेयर सामूहिक लगानी कोषका लागि सुरक्षित गरिएको छ । बाँकी रहेको ९६ लाख कित्ता सेयर सर्वसाधारणका लागि खुला गरेको छ ।

यो आईपीओमा आईपीओमा न्यूनतम १० कित्ताका लागि आवेदन दिनु पर्नेछ भने अधिकतममा १० हजार कित्ताका लागि आवेदन दिन सकिनेछ।

शाइन रेसुंगा डेभलपमेन्ट बैंक ‘इमर्जिङ एसिया बैंकिङ अवार्ड–२०२२’बाट सम्मानित भएको छ।

भारतको गोवामा शनिबार भएको एक कार्यक्रमबीच बेस्ट पर्फमेन्स अन प्रोफिटाबिलिटी र बेस्ट पर्फमेन्स अन ग्रोथ क्याटेगोरिजका आधारमा शाइन रेसुंगा डेभलपमेन्ट बैंक उत्कृष्ट हुँदै अवार्ड जितेको हो । सो अवार्ड शाइन रेसुंगा डेभलपमेन्ट बैंकका ब्रान्डिङ हेड प्रभास राईले ग्रहण गरेका थिए।

इन्डियन च्याम्बर अफ कमर्सले आह्वान गरेको खुला प्रतिस्पर्धामा भारत, बंगलादेश, भुटान, म्यानमार, श्रीलंका र नेपाल गरी ६ देशका बैंक तथा वित्तीय संस्थाले अवार्डका आवेदन दिएका थिए । इन्डियन च्याम्बर अफ कमर्सको आर्थिक मामिला तथा नीति विभागले विभिन्न १७ वटा सूचक निर्धारण गरेको थियो । जसमध्ये शाइन रेसुंगाले कुल सम्पत्ति, कुल निक्षेप, कुल कर्जा तथा सापटी, खुद कर्जा तथा सापटी, कुल ब्याज आर्जन, कुल ब्याज खर्च, शुल्कमा आधारित आम्दानी, सञ्चालन खर्च, करपछिको खुद नाफा, प्रावधान र आकस्मिकता तथा अन्य आम्दानीलगायतका सूचकमा उत्कृष्ट भएको हो।

अन्तर्राष्ट्रियस्तरमा ख्यातिप्राप्त प्राइसवाटरहाउस कुप (पीडब्ल्यूसी) अवार्ड छनौटको निर्णायकमा थियो।

स्थापनाकालदेखि नै इथिकल बैंकिङको मूल्य मान्यतामा अगाडि बढेकाले अहिले इमर्जिङ एशिया बैंकिङ अवार्ड प्राप्त गर्न सफल भएको बैंकका प्रमुख कार्यकारी अधिकृत प्रकाश पौडेलले बताए। ‘यससबाट बैंकको उचाइ थप माथि पुगेको छ’, उनले भने, ‘यो अन्तर्राष्ट्रिय अवार्ड पाउनुमा बैंकका सञ्चालक, कर्मचारी र सेवाग्राही सबैको योगदान र साथ रहेको छ।’

बैंकले गत वर्ष न्यु बिजनेस एज प्रालिले आयोजना गरेको प्रतिस्पर्धामा बेस्ट म्यानेज्ड डेभलपमेन्ट बैंक अवार्ड जितेको थियो।

बैंक बुटवलमा केन्द्रीय कार्यालय रहेको लुम्बिनी प्रदेशको एकमात्र राष्ट्रियस्तरको विकास बैंक शाइन रेसुंगाले हाल बैंक देशभर ८८ वटा शाखा, एउटा एक्सटेन्सन काउन्टर र १६ वटा एटीएमबाट बैंकिङ सुविधा प्रदान गर्दै आएको छ।

चिनियाँ सरकारले फाइनान्सियल टेक्नोलोजी कम्पनी एन्ट ग्रुपमाथि ९८ करोड ५० लाख डलर जरिवाना लगाएको छ। 

यो जरिवाना एन्ट र यसका सहायक कम्पनीलाई लगाइएको हो। योसँगै कम्पनीलाई यसको क्राउड फन्डिङ प्लेटफर्म सियाङहुबाओ बन्द गर्न आदेश पनि चीन सरकारले दिएको छ। 

यो कारबाहीपछि एन्ट ग्रुपले २०२० बाट आफ्नो व्यवसायमा निरन्तर सुधार भइरहेको र सबै नियम पूर्ण गम्भीरता र इमान्दारीका साथ पालना गर्ने जनाएको छ। 

चिनियाँ अधिकारीहरुले अब टेक कम्पनीहरुमाथिको नियन्त्रणमा छुट दिने तयारी गरिरहेको बताएका छन्। एन्ट ग्रुपमाथि कारबाही २०२० मा चिनियाँ सरकारले सुरु गरेको थियो। जसमा यसको सहायक कम्पनी अलिबाबालाई २.८ अर्ब डलरको एन्टी–ट्रस्ट जरिवाना लगाइएको छ। सवारी ह्यान्डलिङ एप दिदीलाई १.२ अर्ब डलर जरिवाना पनि लगाइएको थियो।

एन्ट विश्वको सबैभन्दा ठूलो फाइनान्सियल टेक्नोलोजी कम्पनी हो। यो २०१४ मा स्थापित भएको थियो। चिनियाँ नियामकले नोभेम्बर २०२० मा एन्टको आईपीओलाई रोकेको थियो। यो विश्वको सबैभन्दा ठूलो आईपीओ थियो। हङकङ र सांघाई बजारका लगानीकर्ताबाट करिब ३४ अर्ब डलर जुटाएको थियो।

एन्ट ग्रुपका संस्थापक ज्याक माले २०२० मा चिनियाँ नियामकहरुको आलोचना गरेका थिए। त्यसयता चीन सरकारले उनका कम्पनीविरुद्ध कारबाही गरिरहेको छ। यसबीच ज्याक मा लामो समयसम्म गायब भएका थिए। 

यसअघि पनि चिनियाँ सरकारको आलोचना गर्दा धेरै व्यापारी बेपत्ता भएका थिए। –एजेन्सी

नेपाल राष्ट्र बैंकले राष्ट्र उत्थान लघुवित्तलाई प्राप्ति गर्न आशा लघुवित्तलाई अन्तिम स्वीकृति प्रदान गरेको छ। 

राष्ट्र बैंकले गत शुक्रबार (असार २२ गते) आशा लघुवित्तलाई पत्र पठाउँदै राष्ट्र उत्थान लघुवित्तलाई प्राप्ति गर्न अन्तिम स्वीकृति प्रदान गरिएको जानकारी गराएको हो। 

यसअघि गत जेठ २३ गते नेपाल राष्ट्र बैंकले आशा र राष्ट्र उत्थान लघुवित्तबीचको प्राप्ति प्रक्रियालाई सैद्धान्तिक सहमति प्रदान गरेको थियो। 

यी दुवै लघुवित्तबीच गत चैत २९ गते प्राप्ति प्रक्रिया अगाडि बढाउने प्रारम्भिक सम्झौता भएको थियो। दुवै संस्थाका सञ्चालक समितिका अधिकारीहरुबीच प्राप्तिसम्बन्धी प्रारम्भिक सम्झौतापत्र हस्ताक्षर गरेका थिए। 

नेपाल बीमा प्राधिकरणले प्रभु महालक्ष्मी लाइफ इन्स्योरेन्स लिमिटेडको प्रमुख कार्यकारी अधिकृत (सीईओ)मा रमेशकुमार भट्टराईको नियुक्तिलाई स्वीकृति दिएको छ। 

प्रभु लाइफ इन्स्योरेन्स र महालक्ष्मी लाइफ इन्स्योरेन्सको एकीकृत कारोबार यही असार २९ गते हुने निर्णय भइसकेको छ। दुवै कम्पनीबीचमा २०७९ असार ३० गते मर्जरको प्रारम्भिक सहमति र २०८० जेठ  ३ गते अन्तिम सहमति भएको थियो। 

सिनर्जी पावर डेभलपमेन्ट कम्पनी (SPDL) ले हकप्रद शेयर निष्काशनका लागि साउन १२ गते बुक क्लोज मिति तय गरेको छ । त्यसैले साउन ११ गतेसम्म कारोबार गरि कायम हुने सेयरधनीहरुले मात्रै यो कम्पनीको हकप्रद शेयर भर्न योग्य हुनेछन्।

कम्पनीले चुक्तापुँजी ८० करोड ६५ लाख रुपैयाँको ५० प्रतिशत अर्थात् ४० करोड ३२ लाख ८७ हजार ५०० रुपैयाँ बराबरको १०० रुपैयाँ अंकित दरका कुल ४० लाख ३२ हजार ८७५ कित्ता हकप्रद शेयर जारी गर्न लागेको छ।सिनर्जी पावरको हकप्रद शेयर निष्काशन तथा बिक्री प्रबन्धकमा सानिमा क्यापिटल रहेको छ।