चन्द्रागिरी इन्भेष्टमेन्ट ग्रुप लिमिटेडले आइपीओ निष्कासन गर्ने भएको छ । कम्पनीले १० करोड रुपैयाँ बराबरको १० लाख कित्ता सेयर सर्बसाधारणका लागि निष्कासन गर्ने भएको हो ।
कम्पनीको शनिबार सम्पन्न पहिलो साधारणसभाले आइपिओ निस्कासन गर्ने प्रस्ताव पारित गरेको हो । कम्पनीको अधिकृत पूँजी ५० करोड रुपैयाँ छ ।

कम्पनीको साधारणसभाले चुक्ता पूँजीको ४ प्रतिशतका दरले नगद लाभांश वितरण गर्ने प्रस्ताव पनि पारित गरेको छ । यसै गरी साधारणसभाले ६ जना संचालक निर्बिरोध चयन गरेको छ ।

निर्वाचनबाट निर्विरोध निर्वाचित हुने संचालकहरुमा राजन श्रेष्ठ, रामराजा आचार्य, प्रकाशमान श्रेष्ठ, धिरेन्द्र श्रेष्ठ, शंकर महर्जन र बीरेन्द्र श्रेष्ठ रहेका छन् । साधारणसभाले अध्यक्ष राजन श्रेष्ठले प्रस्तुत गरेको बार्षिक प्रतिवेदन र लेखा परीक्षकको प्रतिवेदन पारित गरेको छ ।

होल्डिङ कम्पनीका रुपमा रहेको चन्द्रागिरी इन्भेष्टमेन्ट ग्रुप लिमिटेडले इन्द्रेणी मस्रुम फार्म, द निलय होटल्स लिमिटेड, काउले भाइनियार्ड एग्रो, एभरेष्ट कलर र मेरो किसार्नलगायतका कम्पनीमा लगानी गरेको अध्यक्ष राजन श्रेष्ठले जानकारी दिए ।

अप्पर लोहरे खोला हाइड्रोपावर कम्पनीले चालु आर्थिक वर्षको दोस्रो त्रैमासिक वित्तीय विवरण सार्वजनिक गरेको छ। विवरणअनुसार कम्पनीले यस अवधिसम्म ४९ लाख ७७ हजार रुपैयाँ नाफा कमाएको छ, जुन गत आर्थिक वर्षको सोही अवधिमा भएको २ करोड १५ लाख २१ हजार रुपैयाँ घाटाको तुलनामा उल्लेखनीय सुधार हो।

कम्पनीको नाफामा सुधार हुनुमा विद्युत बिक्रीबाट हुने आम्दानीमा भएको उल्लेख्य वृद्धि मुख्य कारण रहेको छ। दोस्रो त्रैमाससम्म कम्पनीले विद्युत बिक्रीमार्फत २ करोड ७० लाख २६ हजार रुपैयाँ आम्दानी गरेको छ, जुन गत वर्षको सोही अवधिको ९० लाख ४० हजार रुपैयाँको तुलनामा १९८.९६ प्रतिशतले बढी हो।

वित्तीय सूचकांकतर्फ हेर्दा, कम्पनीको प्रतिसेयर आम्दानी (ईपीएस) ०.९८ रुपैयाँ, प्रतिसेयर नेटवर्थ ९४.६९ रुपैयाँ, मूल्य आम्दानी अनुपात (पीई रेसियो) ४६१.२१ गुणा र तरलता अनुपात ०.६४ रहेको छ।

काठमाडौं — काठमाडौँ उपत्यकामा सार्वजनिक बिदा पर्दा देशभर सेयर कारोबार बन्द गरिने व्यवस्थाप्रति लगानीकर्ता शिव चन्द्रले असन्तुष्टि व्यक्त गरेका छन्।

उनले काठमाडौँ केन्द्रित निर्णयले मोफसलका लगानीकर्तामाथि अन्याय भइरहेको उल्लेख गर्दै “नेपाल धितोपत्र बोर्ड हो कि काठमाडौँ धितोपत्र बोर्ड?” भन्ने प्रश्न उठाएका छन्।

उनका अनुसार देशभरबाट अनलाइन प्रणालीमार्फत सेयर कारोबार भइरहेको वर्तमान अवस्थामा काठमाडौँमा मात्र बिदा हुँदा सम्पूर्ण बजार बन्द गर्नु उपयुक्त नभएको बताएका छन्।

यसले काठमाडौँ बाहिर रहेका लगानीकर्ताको पहुँच र अधिकारमा असर पर्ने भन्दै उनले सम्बन्धित निकायले यस विषयमा पुनर्विचार गर्नुपर्ने आवश्यकता औंल्याएका छन्।

विशेषगरी नेपाल स्टक एक्सचेञ्ज जस्तो डिजिटल प्लेटफर्ममार्फत कारोबार भइरहेको अवस्थामा भौगोलिक आधारमा बजार बन्द गर्नु व्यवहारिक नदेखिएको उनको भनाइ छ।

लगानीकर्ताहरूबीच पनि यस विषयमा बहस बढ्दै गएको छ भने बजार सञ्चालन प्रणालीलाई अझ समावेशी र देशव्यापी बनाउने माग उठ्न थालेको छ।

काठमाडौं — प्रभु हेलिकप्टर लिमिटेड ले चौथो वार्षिक साधारण सभा आह्वान गरेको छ।

कम्पनीको चैत २ गते बसेको सञ्चालक समितिको बैठकले सभा चैत २७ गते काठमाडौंको नागपोखरीस्थित अरण्य बुटिक होटलमा बिहान १०ः३० बजे बस्ने निर्णय गरेको हो।

सभामा आर्थिक वर्ष २०८१/८२ को वार्षिक प्रतिवेदनमाथि छलफल गरी पारित गर्ने, सोही आवको वासलात, नाफा–नोक्सान हिसाब, नगद प्रवाह विवरण लगायतका वित्तीय विवरण स्वीकृत गर्ने प्रस्ताव पेश गरिनेछ।

त्यस्तै, आर्थिक वर्ष २०८२/८३ का लागि लेखापरीक्षक नियुक्त गर्ने र पारिश्रमिक निर्धारण गर्ने, सञ्चालकको नियुक्ति अनुमोदन गर्ने एजेन्डा पनि सभामा रहेको छ।

सभाको विशेष प्रस्तावअन्तर्गत कम्पनीको प्रबन्धपत्र तथा नियमावली संशोधन गर्ने विषय समेत समावेश गरिएको छ।

यसैबीच, कम्पनीले प्रति सेयर १०० रुपैयाँ अंकित मूल्यमा ६१ करोड २५ लाख रुपैयाँ बराबरको ६१ लाख २५ हजार कित्ता आईपीओ निष्कासनका लागि नेपाल धितोपत्र बोर्ड मा अनुमति माग्दै निवेदन पेश गरिसकेको छ।

काठमाडौं — प्रभु महालक्ष्मी लाइफ इन्स्योरेन्स कम्पनी ले संस्थापक समूहअन्तर्गत रहेको १० प्रतिशत सेयर सर्वसाधारण (पब्लिक) सेयरमा रूपान्तरण गर्ने भएको छ।

यस प्रस्तावलाई अनुमोदन गर्न कम्पनीले चैत १९ गते विशेष साधारण सभा आह्वान गरेको छ। चैत ३ गते बसेको सञ्चालक समितिको बैठकले उक्त प्रस्ताव पारितका लागि सभा बोलाउने निर्णय गरेको हो।

सभा काठमाडौंको भाटभटेनीस्थित आम्रपाली ब्याङ्क्वेटमा बिहान ९ बजे बस्नेछ।

सभाको अर्को महत्वपूर्ण एजेन्डाअनुसार, कम्पनीको प्रबन्धपत्र तथा नियमावलीमा नियामक निकायबाट आवश्यक परेमा गरिने संशोधन, थपघट वा भाषिक परिमार्जनका लागि सञ्चालक समितिलाई पूर्ण अधिकार प्रदान गर्ने प्रस्ताव पनि पेश गरिनेछ।

यस निर्णयले कम्पनीको सेयर संरचना परिवर्तन भई सर्वसाधारण लगानीकर्ताको सहभागिता थप बढ्ने अपेक्षा गरिएको छ।