पिपुल्स पावर लिमिटेडको सेयरमूल्य समायोजन भएको छ । कम्पनीले जारी गर्न लागेको १ः०.५० अनुपातको हकप्रद सेयरका लागि सेयरमूल्य समायोजन भएको छ ।

नेप्सेमा भएको सेयरमूल्य समायोजनपश्चात कम्पनीको सेयरमूल्य प्रतिकित्ता ३६१.१३ रुपैयाँ कायम भएको छ । समायोजनअघि कम्पनीको सेयरमूल्य प्रतिकित्ता ४९१.७० रुपैयाँ कायम थियो । आजको कारोबारमा यही मूल्यका आधारमा दोस्रो बजारमा कम्पनीको सेयर कारोबार हुनेछ ।

कम्पनीले हकप्रद सेयर निष्कासनका लागि असार २ गते बुक क्लोज गर्दैछ । यसर्थ असार १ गतेसम्म नेप्सेमा कारोबार भई कायम भएका सेयरधनीहरु मात्रै कम्पनीद्वारा जारी गरिने हकप्रदका लागि योग्य हुनेछन् । कम्पनीले १ः०.५० अनुपातमा प्रति सेयर रू. १०० दरका ३१ लाख ६३ हजार कित्ता साधारण सेयर हकप्रद निष्कासन गर्नेछ । कम्पनीको हकप्रद निष्कासन तथा बिक्री प्रबन्धकको रुपमा प्रभु क्यापिटल रहेको छ । । कम्पनीले नेपाल धितोपत्र बोर्डबाट जेठ २ गते हकप्रदका लागि स्वीकृती प्राप्त गरेको थियो ।

ज्योति विकास बैंक लिमिटेडले आफ्नो संस्थापक समूहको स्वामित्वमा रहेको सेयर आजदेखि बिक्रीमा राखेको छ। बैंकका अनुसार संस्थापक सेयरधनीको स्वामित्वमा रहेको संस्थापक सेयर बिक्री गर्न लागिएको हो, र उक्त सेयर हाल बैंकका विद्यमान संस्थापक सेयरधनीहरुले मात्र खरिद गर्न सक्नेछन्।

यद्यपि, बैंकले कति संख्यामा सेयर बिक्रीमा राखिएको हो भन्ने विवरण भने सार्वजनिक गरेको छैन। इच्छुक संस्थापक सेयरधनीहरुले बैंकको काठमाण्डौ, कमलपोखरीस्थित केन्द्रीय कार्यालयमा आफ्नो खरिद इच्छा खुलाउँदै आवश्यक आवेदन दिनुपर्नेछ। आवेदनमा के कति संख्यामा सेयर खरिद गर्न चाहिएको हो भन्ने स्पष्ट उल्लेख गर्नुपर्नेछ।

सेयर खरिदका लागि आजैदेखि सुरु भएको आवेदन दिने समयसीमा सूचना प्रकाशित भएको मितिले ३५ दिनसम्म कायम रहनेछ। यदि सो अवधिभित्र कुनै संस्थापक सेयरधनीबाट आवेदन नपरेमा बैंकले अन्य व्यक्ति वा कम्पनीलाई सेयर बिक्री गर्ने प्रक्रिया अघि बढाउने जनाएको छ।