काठमाडौं । गत भदौ २३ र २४ गते भएको आन्दोलनका क्रममा तारागाउँ रिजेन्सी होटल्स लिमिटेड (हयात रिजेन्सी, काठमाडौं) मा व्यापक क्षति पुगेको छ । होटलले आइतबार जारी गरेको प्रेस विज्ञप्तिमा तोडफोड, लुटपाट र आगलागी जन्य गतिविधिका कारण होटलका गेस्ट रुम, कार्यकक्ष, रिसेप्सन, लबी, रेस्टुरेन्ट, वैंक्वेट हल र चैत्य क्षेत्रसहित सम्पूर्ण संरचनामा ठूलो क्षति पुगेको उल्लेख गरिएको छ ।
विज्ञप्तिअनुसार, होटल हाल पूर्ण रूपमा बन्द गरिएको छ र क्षतिको विस्तृत मूल्याङ्कन कार्य जारी छ । होटलले मूल्याङ्कनपछि स्तरउन्नति र पुनर्निर्माण गरी अझ उत्कृष्ट सेवासहित पुनः सञ्चालनमा ल्याउने तयारी भइरहेको जनाएको छ । सो कार्य सम्पन्न हुन करिब एक वर्ष लाग्ने अनुमान गरिएको छ ।
🏨 दुई दशकदेखि नेपालको पर्यटन क्षेत्रको मुख्य आधार
हयात रिजेन्सी काठमाडौंले पछिल्ला साढे दुई दशकदेखि नेपालको पर्यटन क्षेत्रको अग्रणी होटलको रूपमा निरन्तर सेवा दिँदै आएको छ । सशस्त्र द्वन्द्व, शान्ति प्रक्रिया, संविधान निर्माण, भूकम्प र कोभिड–१९ महामारीजस्ता कठिन समयहरूमा पनि होटलले निरन्तर रूपमा हजारौं व्यक्तिलाई रोजगारी प्रदान गरेको उल्लेख गरिएको छ ।
नेपाल सरकारले आर्थिक वर्ष २०७९/८० सहित सातौँ पटकसम्म पर्यटन क्षेत्रमा सबैभन्दा बढी आयकर तिर्ने करदाताको रूपमा हयात रिजेन्सीलाई सम्मानित गरेको थियो । साथै, दुई पटक विदेशी मुद्रा संकलनमा उत्कृष्ट योगदान पुर्याउने होटलको रूपमा पनि सरकारले सम्मान गरेको थियो ।
💬 “देशको आर्थिक समृद्धिमा योगदान पुर्याउने होटलमाथि आक्रमण निन्दनीय”
होटलले जारी गरेको विज्ञप्तिमा आन्दोलनका क्रममा भएको तोडफोड र आगलागीप्रति गम्भीर दुःख र आपत्ति जनाइएको छ ।
विज्ञप्तिमा भनिएको छ, “देशको आर्थिक समृद्धिमा महत्वपूर्ण योगदान पुर्याएको यस होटलमाथि आन्दोलनका क्रममा गरिएको आक्रमण निन्दनीय छ।”
होटलका अनुसार, यस्तो घटनाले पर्यटन क्षेत्रमा नकारात्मक सन्देश पठाएको छ र सरकार तथा सरोकारवालाहरूले यस्ता गतिविधि दोहोरिन नदिन कडाइका साथ कदम चाल्नुपर्ने आवश्यकता औँल्याइएको छ ।
🙏 प्रधानमन्त्री र अर्थमन्त्रीप्रति आभार
विज्ञप्तिमा प्रधानमन्त्री सुशीला कार्की र अर्थमन्त्री रामेश्वर प्रसाद खनालप्रति पनि आभार व्यक्त गरिएको छ ।
उनीहरूले उत्पन्न विषम परिस्थितिलाई सम्बोधन गर्दै नेपाल सरकारबाट आवश्यक सहयोग र साथ प्रदान गरिने आश्वासन दिएको उल्लेख छ ।
🔧 “अझ उत्कृष्ट सेवासहित पुनः सञ्चालनमा ल्याउने प्रतिबद्धता”
कार्यकारी निर्देशक सुरेश लाल श्रेष्ठले हस्ताक्षर गरेको विज्ञप्तिमा भनिएको छ,
“होटलमा भएको क्षतिको पूर्ण मूल्याङ्कन पश्चात्, यसलाई स्तरउन्नति र पुनर्निर्माण गर्दै अझ विस्तारित र उत्कृष्ट सेवासहित यथासिघ्र पुनः सञ्चालनमा ल्याउने हाम्रो प्रतिबद्धता रहेको छ।”
श्रेष्ठका अनुसार, पुनर्निर्माणपछि हयात रिजेन्सीले देशको पर्यटन, रोजगारी र राजस्व वृद्धिमा थप योगदान पुर्याउने लक्ष्य लिएको छ ।
