नयाँ स्टक एक्सचेन्जको लाइसेन्सका लागि थप अध्ययन गर्नु नपर्ने भन्दै धितोपत्र बोर्डले अर्थ मन्त्रालयलाई जवाफ पठाएको छ । धिबोले यसका लागि पहिला नै अध्ययन भईसकेकोले धिबोले पुन अध्ययन नगर्ने निर्णय गर्दै सो ब्यहोरा अर्थ मन्त्रालयलाई जनाएको हो ।
शुक्रबार बिहान बसेको बोर्ड सञ्चालक समितिको बैठकले नयाँ स्टकको लाइसेन्सका लागि थप अध्ययन गर्नु नपर्ने भन्दै आवश्यक निर्णय गरिदिन अर्थ मन्त्रालयमार्फत सरकारलाई आग्रह गर्ने निर्णय गरेको हो ।
बोर्डको अघिल्लो बैठकले पनि अर्थ मन्त्रालयलाई नयाँ स्टकको लाइसेन्सका लागि प्रक्रिया अगाडि बढाउन आग्रह गर्दै पत्र लेखेकोमा अर्थ मन्त्रालयले थप स्पष्ट बनाउन भन्दै मन्त्रिपरिषद्मा नलगी धितोपत्र बोर्डमा नै फिर्ता पठाएको थियो ।
अर्थ मन्त्रालयले मन्त्रिपरिषद्को निर्णयले रोकिएकोले मन्त्रिपरिषद्को निर्णय आबस्यक पर्ने भन्दै यसअघी अर्थ मन्त्रालयले बोर्डलाई पत्र फिर्ता पठाएको थियो ।
अर्थ मन्त्रालयले नयाँ स्टकको लाइसेन्सका लागि अध्ययन गर्न आवश्यक छ कि छैन भनेरसमेत बोर्डसँग स्पष्ट पार्न आग्रह गरेको थियो ।
त्यसैले शुक्रबारको बोर्ड बैठकले यसअघि नै अध्ययन गरेर लाइसेन्स दिन लागेको जानकारी दिँदै थप अध्ययन गर्न आवश्यक नरहेको तर सरकारले अध्ययन गर्न आवश्यक देखेमा सोही अनुसारको निर्णय गर्न आग्रह गर्दै अर्थ मन्त्रालयमार्फत मन्त्रिपरिषद्मा पत्र पठाउने निर्णय गरेको श्रोतको भनाइ छ ।
