काठमाडौँ । विकाश हाईड्रोपावर कम्पनी लिमिटेडले आज (असार १८ गते) देखि सर्वसाधारणका लागि आफ्नो प्रारम्भिक सार्वजनिक निष्कासन (IPO) खुला गरेको छ। कम्पनीले सर्वसाधारणका लागि जम्मा २९ लाख ४२ हजार ७६० कित्ता साधारण सेयर निष्कासन गरेको हो।
यसअघि कम्पनीले गत वैशाख १५ गते ४४ लाख ५४ हजार ५९६ कित्ता सेयर निष्कासन गर्न नेपाल धितोपत्र बोर्ड (सेबोन) बाट अनुमति प्राप्त गरेको थियो।
🔹 यसअघि जारी गरिएको सेयर विवरण:
- अति प्रभावित क्षेत्र (गोर्खा, धार्चे गाउँपालिका वडा नं. ४ र ५): ३ लाख ६३ हजार ६४० कित्ता
- प्रभावित क्षेत्र (धार्चे गाउँपालिका वडा नं. १, २, ३, ६ र ७): ५ लाख ४५ हजार ४६१ कित्ता
- वैदेशिक रोजगारमा रहेका नेपाली: ३ लाख ५४ हजार ५५० कित्ता
(यी सेयरहरू जेठ ६ गतेदेखि २० गतेसम्म निष्कासन गरिएका थिए।)
🔹 सर्वसाधारणका लागि आवेदन प्रक्रिया:
सर्वसाधारण लगानीकर्ताहरूले न्यूनतम १० कित्ता र अधिकतम १०,००० कित्तासम्म आवेदन दिन सक्नेछन्।
आवेदन नेपाल धितोपत्र बोर्डबाट स्वीकृति प्राप्त ASBA सदस्य बैंक तथा वित्तीय संस्थाहरू, तिनका शाखा कार्यालयहरू वा मेरोसेयर पोर्टलमार्फत गर्न सकिन्छ।
🔹 इक्रा नेपालद्वारा रेटिङ:
इक्रा नेपालले विकाश हाईड्रोपावरलाई ‘ICRA NP Issuer Rating BBB– (Triple B Minus)’ रेटिङ दिएको छ, जसले कम्पनीको दायित्व बहन क्षमतामा औसत जोखिम रहेको संकेत गर्छ।
🔹 आवेदन म्याद:
- छिटोमा बन्द हुने मिति: असार २२ गते
- ढिलोमा बन्द हुने म्याद: असार ३२ गते
🔹 बिक्री प्रबन्धक:
यस आईपीओको बिक्री प्रबन्धकको जिम्मेवारी प्रभु क्यापिटल लिमिटेड ले लिएको छ।
