काठमाडौं — दोर्दी खोला जलविद्युत कम्पनी लिमिटेडले लिलामीमार्फत बिक्रीमा ल्याएको अवितरित हकप्रद सेयरमा आवेदन दिने समयावधि जेठ २० गतेसम्म थप गरिएको छ। यसअघि अन्तिम म्याद जेठ १९ गते तोकिएको थियो।
कम्पनीले १:१ अनुपातमा निष्कासन गरेको हकप्रद सेयरमा आवेदन नपरेको १९ लाख ४६ हजार ६७६ कित्ता सेयर लिलामी प्रक्रियाबाट बिक्री गर्न लागेको हो। यसअघि चैत १९ देखि वैशाख ८ गतेसम्म हकप्रद खुला गरिएको थियो, जसमा वैशाख १२ देखि १४ सम्म पुनः समयावधि थप गरिएको थियो।
लिलामी सेयरको न्यूनतम मूल्य प्रतिकित्ता १०० रुपैयाँ तोकिएको छ। इच्छुक व्यक्ति, कम्पनी वा संघसंस्थाहरूले न्यूनतम १०० कित्तादेखि अधिकतम सम्पूर्ण कित्तासम्म खरिदका लागि बोलपत्र पेश गर्न सक्नेछन्।
बोलपत्र आवेदन सानिमा क्यापिटलको नक्साल कार्यालयका साथै विराटनगर, विर्तामोड, वीरगञ्ज, जनकपुर, भरतपुर, हेटौडा शाखाबाट पेश गर्न सकिनेछ। साथै, सानिमा बैंकका पोखरा, बुटवल, घोराही, नेपालगञ्ज, विरेन्द्रनगर, धनगढी र महेन्द्रनगर शाखा तथा गरिमा विकास बैंकको बागलुङ शाखा कार्यालयबाट समेत आवेदन दिन सकिनेछ।
कम्पनीले लगानीकर्ताहरूलाई तोकिएको समयभित्र आवश्यक कागजातसहित बोलपत्र पेश गर्न अनुरोध गरेको छ।
