काठमाडौं — सप्तकोशी डेभलपमेन्ट बैंक लिमिटेडले संस्थापक सेयरधनीको स्वामित्वमा रहेका कुल ४०,००० कित्ता संस्थापक सेयर बिक्रीमा राखेको छ। बैंकले आज (जेठ १४ गते) देखि बोलपत्र प्रणालीमार्फत सेयर बिक्री प्रक्रिया सुरु गरेको हो।
बैंकका अनुसार सेयर खरिदका लागि विद्यमान संस्थापक सेयरधनीका साथै इच्छुक आम सर्वसाधारण लगानीकर्ताले पनि आवेदन दिन सक्नेछन्। बिक्रीका लागि तोकिएको न्यूनतम प्रतिकित्ता मूल्य ११० रुपैयाँ रहेको छ।
बोलपत्र आवेदन पेश गर्दा न्यूनतम १०० कित्तादेखि अधिकतम ४०,००० कित्तासम्मका लागि आवेदन दिन सकिनेछ। सेयर खरिदमा रुचि राख्ने व्यक्तिहरूले आगामी जेठ २५ गतेभित्र आवेदन दिई सक्नुपर्नेछ।
बैंकले सेयर बिक्री सम्बन्धी थप जानकारीका लागि आफ्ना शाखा कार्यालयहरू वा केन्द्रीय कार्यालयमा सम्पर्क गर्न अनुरोध गरेको छ।
