विद्युत बिक्री आम्दानीमा उल्लेख्य वृद्धि भएपछि घलेम्दी हाईड्रो लिमिटेड को घाटा कम भएको छ। चालु आर्थिक वर्षको तेस्रो त्रैमाससम्म कम्पनी २ करोड ४६ लाख रुपैयाँ घाटामा रहेको छ, जुन अघिल्लो आवको सोही अवधिको ७ करोड ३० लाख रुपैयाँ घाटाको तुलनामा ६६.२५ प्रतिशतले कमी हो।
आम्दानीमा ४८.५८ प्रतिशत वृद्धि
कम्पनीले समीक्षा अवधिसम्ममा ८ करोड ६२ लाख रुपैयाँ विद्युत बिक्री आम्दानी आर्जन गरेको छ। साथै, २ करोड ९२ लाख रुपैयाँ ब्याज आम्दानी सहित कुल आम्दानी ११ करोड ५६ लाख रुपैयाँ पुगेको छ। विद्युत बिक्री आम्दानी अघिल्लो आवको तुलनामा ४८.५८ प्रतिशतले बढी हो।
खर्च घटाएर नोक्सानी घटाउने प्रयास
अघिल्लो आवमा १५ करोड ८ लाख रुपैयाँ रहेको कुल खर्च घटेर १३ करोड २९ लाख रुपैयाँ मा सीमित भएको छ। खर्चमा आएको यो कमीले पनि घाटा न्यूनिकरणमा भूमिका खेलेको देखिन्छ।
वित्तीय स्थिति
- चुक्ता पूँजी: १ अर्ब ६५ करोड रुपैयाँ
- ऋणात्मक रिजर्भ: २३ करोड ४१ लाख रुपैयाँ
- सेयर प्रिमियम: १८ करोड १५ लाख रुपैयाँ
- अल्पकालीन कर्जा: २७ लाख १२ हजार रुपैयाँ
- दीर्घकालीन कर्जा: ६९ करोड २४ लाख रुपैयाँ
प्रमुख वित्तीय सूचकहरू:
- प्रतिशेयर आम्दानी (EPS): – रु. १.४९
- प्रतिशेयर नेटवर्थ: रु. ९६.८१
- प्रतिशेयर कुल सम्पत्तिको मूल्य: रु. १३९.५७
- P/E अनुपात: – १०२.५१ गुणा
- तरलता अनुपात: ९.२१%
लगातार घाटामा रहेको भए पनि आम्दानी बढेपछि कम्पनीले वित्तीय सुधारको संकेत दिएको छ।
