हालै शिक्षा मन्त्रीबाट राजीनामा दिएकी विद्या भट्टराई र राज्यमन्त्रीबाट बर्खास्त भएका पूर्णबहादुर तामाङलाई संसदीय समितिमा मनोनयन गरिएको छ। प्रतिनिधि सभाका सदस्यहरूको समिति हेरफेर गर्दै उनीहरूलाई विभिन्न समितिमा पठाइएको हो।
भट्टराईलाई शिक्षा, स्वास्थ्य तथा सूचना प्रविधि समितिको सदस्यमा मनोनयन गरिएको छ। उनी मन्त्री बन्नुअघि पनि सोही समितिमा सदस्य थिइन्। प्रतिनिधि सभा नियमावलीअनुसार मन्त्री नियुक्त भएपछि संसदीय समितिबाट स्वतः बिदा हुने व्यवस्था छ।
त्यस्तै, तामाङलाई अर्थ समितिको सदस्यमा नियुक्त गरिएको छ। साथै, एमाले सांसद पदम गिरीलाई अर्थ समितिबाट हटाई राज्य व्यवस्था तथा सुशासन समितिमा पठाइएको छ। गिरीलाई रघुजी पन्त मन्त्री बनेपछि सो समितिमा लगिएको हो।
प्रतिनिधि सभाको आजको बैठकमा सभामुख देवराज घिमिरेले समितिहरूमा सांसदहरू हेरफेर गरिएको सूचना प्रस्तुत गरेका थिए।
