नेपाल राष्ट्र बैंकले पोखरा फाइनान्सलाई समस्याग्रस्त घोषणा गर्ने अन्तिम तयारी गरिरहेको छ।
राष्ट्र बैंकको सञ्चालक समितिले राष्ट्र बैंक ऐन, २०५८ को दफा ८६(६) अनुसार पोखरा फाइनान्सलाई १५ दिनभित्र स्पष्टिकरण दिन मौका दिने निर्णय गरेको छ।
वित्तीय सूचकांकहरू अधिकांश कमजोर रहेको भन्दै समितिले फाइनान्सलाई सीमित १५ दिनको समय मात्र सफाइको लागि उपलब्ध गराउने निर्णय लिएको हो।
चालु आर्थिक वर्षको पहिलो त्रैमासमा पोखरा फाइनान्सको खराब कर्जा १४.४४ प्रतिशतमा थियो, जुन राष्ट्र बैंकको पछिल्लो तथ्यांकअनुसार ४१.०७ प्रतिशतसम्म पुगेको देखिएको छ।
साथै, पोखरा फाइनान्सको पुँजीकोष ऋणात्मक अवस्थामा पुगेको छ। यसमा ८.५७ प्रतिशतको गिरावट आएको छ, जसले गर्दा पुँजीकोष झन्डै ७१ करोड ११ लाख रुपैयाँ ऋणात्मक बनेको छ।
