अर्थमन्त्री डा. प्रकाशशरण महत सरकारी बानिज्य बैंकले ब्याजदर बढाएपछी रिसले आगो भएका छन ।
कृषि विकास, राष्ट्रिय वाणिज्य र नेपाल बैंक गरी तीनओटै बाणिज्य बैंकका सीइओलाई अर्थमन्त्रालयमा बोलाएर अर्थमन्त्री महतले असन्तुष्टि पोख्दै कर्जाको ब्याजदर नबढाउन निर्देश गरेका छन् ।
‘सरकारको नीति ब्याजदर घटोस् भन्ने हो, बजारको माग पनि ब्याजदर घटोस् भन्ने नै छ,’ अर्थमन्त्री महतले असन्तुष्टि पोख्दै भने, ‘तर, तपाईंहरुले नै सरकारको नीतिलाई असहयोग गर्नुभयो । निजी क्षेत्रका बैंकभन्दा धेरैले ब्याजदर बढाउनू भयो । यसमा मेरो गम्भीर ध्यानाकर्षण भएको छ ।’
अर्थमन्त्रीले भद्र सहमती खारेज भईसकेको , तरलता पनि अधिक रहेको तथा कर्जाको माग काम भएको बेला ब्याजदर किन बढाएको भनी जबाफ मागेका थिए ।
‘भद्र सहमति तोड्दा किन ब्याजदर बढ्यो ? र, सरकारी बैंकले नै सरकारको नीति बिपरित किन ब्याजदर बढाउनु भयो ?’ मन्त्री महतले प्रश्न गरे, ‘तपाईंहरु त सरकारको नीतिभन्दा बाहिर जानू भएन नि ।
तीनवटै बैंकका सीइओ गोबिन्द गुरुङ, किरणकुमार श्रेष्ठ र कृष्णबहादुर अधिकारीले सरकारको नीतिलाई समर्थन हुँदाहुँदै , ब्याजदर बढाउन मन नहुँदा नहुँदै पनि ब्याजदर बढाउन आफ्नो बाध्यता भएको जवाफ अर्थमन्त्रीलाई दिएका छन ।
‘असारमा भद्र सहमति खारेज भएपछि हामीले सरकारको नीति अनुसार साउनमा लागू हुने ब्याजदर बढाएनौं तर केही निजी बैंकले बढाए, निक्षेपकर्ताहरुले बढी ब्याजदर भएकै बैंकमा निक्षेप राख्न थाले, यो अवधिमा परिपक्क भएको हाम्रो अर्बौं निक्षेप बढी ब्याज दिने निजी बैंकमा सर्यो ’ सीइओहरुको भनाइ थियो, ‘हामीले आफ्नो निक्षेप नखोसियोस् भनेर ब्याजदर बढाएका हौं।’
उनीहरुले सरकारको नितिलाई सहयोग गर्ने प्रतिवद्धता व्यक्त गरे । तर, निजी बैंकसँग व्यवसायिक प्रतिस्पर्धामा उत्रिनु पर्दा ब्याजदर बढाउनु बाध्यता भएको थपे ।
सीइओहरुको जवाफ सुनिसकेपछी अर्थमन्त्री डा. महतले निक्षेपको बढाए पनि कर्जाको ब्याजदर नबढाउन निर्देशन दिए ।
‘निक्षेपको ब्याजदर त बढाइहाल्नु भयो, आगामी महिना यस्ता विषयमा निर्णय गर्दा हामीसँग पनि सल्लाह गर्नुहोला’ अर्थमन्त्रीले भने, ‘सरकारी बैंकले कर्जाको ब्याजदर बढाएको सुन्नु नपरोस् । स्प्रेड मेन्टेन गरेर होस् कि जे गरेर हुन्छ बढेको ब्याजदर ऋणीको थाप्लोमा हाल्नु भएन ।’
सरकारी लगानीका बैंकले साउनको तुलनामा भदौमा २७ प्रतिशतसम्मले ब्याजदर ब्रिद्धी गरेका छन् ।
भद्र सहमति खारेज भएपछी ब्याजर घट्ने अनुमान गरिएपनी निजी बैंकहरुले ब्याजदर बढाएर एकले अर्काको निक्षेप खोसाखोस गर्न थालेपछी ब्याजदर बढेको हो । निक्षेप तान्ने प्रतिस्पर्धा चलेपछी आफ्नो व्यवसाय जोगाउन ब्याजदर बढाउन बैंकहरु बाध्य भएका हुन् ।
