नियम बिपरित चलेका ३ वटा वाणिज्य बैंकहरुलाई नेपाल राष्ट्र बैंकले कारबाहीको डन्डा चलाएको छ ।
गत आर्थिक वर्षको चौथो त्रैमासमा प्राइम कमर्सियल बैंक, कुमारी बैंक र हिमालयन बैंकलाई नेपाल राष्ट्र बैंकले कारबाही गरेको हो। कुमारी बैंक र हिमालयन बैंकलाई कर्जा/निक्षेप अनुपात कायम नगर्दा कारबाहीमा परेका हुन । त्यस्तै प्राइम कमर्सियल बैंकलाई अन्य शीर्षकमा कारबाही गरेको हो ।
राष्ट्र बैंकबाट क, ख र ग वर्गका इजाजतपत्र प्राप्त संस्थाहरुलाई जारी गरिएको एकीकृत निर्देशन २०७९ को निर्देशन नं. २ कर्जा नोक्सानीको व्यवस्था कायम नगरेको, क्यापिटल एडुकेसी फ्रेमवर्क, २०१५ अनुसार जोखिम भारित सम्पत्ति गणना गर्दा वास्तविकभन्दा कम गरेको र इ.प्रा.नं.१५/०७९को व्यवस्थाविपरीत प्रिमियम दर बढाई ब्याज असुल गरेकोले राष्ट्र बैंक ऐन, २०५८ को दफा १०० को उपदफा २(क)बमोजिम बैंकका प्रमुख कार्यकारी अधिकृतलाई राष्ट्र बैंकले सचेत गराएको छ।
त्यस्तै कुमारी बैंकले २०७९ माघ महिनामा कर्जा/निक्षेप अनुपात कायम नगरेको भन्दै ५९ लाख ६३ हजार ६९४.२२ रुपैयाँ जरिवाना तिराएको छ।
हिमालयन बैंकलाई समेत २०७९ कात्तिक महिनामा कर्जा/निक्षेप अनुपात कायम नगरेको भन्दै राष्ट्र बैंकले १ करोड ३९ लाख ४७ हजार २८.२४ रुपैयाँ जरिवाना तिराएको हो ।
