युक्रेनी सेनाले रुसी भूभागभित्र रहेको एक रासायनिक प्लान्टमा बेलायत निर्मित ‘स्टोर्म श्याडो’ मिसाइल प्रयोग गरी आक्रमण गरेको दाबी गरेको छ।
सेनाका जनरल स्टाफका अनुसार उक्त आक्रमण मंगलबार गरिएको हो, जसमा मिसाइल र हवाई हमलाको संयुक्त अपरेशन सञ्चालन गरिएको थियो। सेनाले सामाजिक सञ्जाल एक्समा लेखेको छ— “ब्रायान्स्क रासायनिक प्लान्ट, जसमा बारुद, विस्फोटक पदार्थ र रकेट इन्धन उत्पादन हुन्छ, रुसको सैन्य औद्योगिक उत्पादनको प्रमुख आधार हो। यो युक्रेनी शहरहरूमा आक्रमण गर्न प्रयोग हुने प्रमुख स्रोत हो।”
युक्रेनी पक्षले यो आक्रमणलाई ‘सफल हमला’को संज्ञा दिएको छ र रुसी वायु रक्षा प्रणाली पार गर्दै मिसाइल लक्ष्यमा लागेको दाबी गरेको छ। हाल आक्रमणबाट भएको क्षतिको मूल्याङ्कन भइरहेको जनाइएको छ।
यस विषयमा रुसबाट तत्काल आधिकारिक प्रतिक्रिया आएको छैन। यद्यपि, रुसले पश्चिमी देशहरूलाई युक्रेनलाई लामो दूरीका हतियार उपलब्ध नगराउन चेतावनी दिँदै आएको छ।
‘स्टोर्म श्याडो’ मिसाइल बेलायत र फ्रान्सले संयुक्त रूपमा विकास गरेको लामो दूरीको हतियार हो, जसको मारक क्षमता करिब २५० किलोमिटर (१५५ माइल) रहेको बताइन्छ।
विश्लेषकहरूको भनाइमा, यस्तो आक्रमणले युक्रेनको प्रतिरक्षा रणनीति थप आक्रामक दिशामा गएको संकेत गर्छ, जसले युरोपमा बढ्दो तनावलाई अझ चर्काउन सक्छ।
