काठमाडौं । नविल बैंक लिमिटेडले मनोज ज्ञवालीलाई प्रमुख कार्यकारी अधिकृत (सीईओ) पदमा नियुक्त गरेको छ। बिहीबार सम्पन्न बैंकको सञ्चालक समितिको बैठकले ज्ञवालीलाई आगामी चार वर्षे कार्यकालका लागि सीईओ नियुक्त गर्ने निर्णय गरेको हो।
पूर्व सीईओ ज्ञानेन्द्र ढुंगानाले नेपाल राष्ट्र बैंकको गभर्नर पदको प्रतिस्पर्धामा सहभागी हुने निर्णयसहित चैत १० गतेदेखि लागू हुने गरी राजीनामा दिएपछि, बैंकले मनोज ज्ञवालीलाई कामु सीईओको जिम्मेवारी दिएको थियो। करिब अढाई महिनासम्म कार्यवाहक सीईओको रूपमा नेतृत्व सम्हालेका ज्ञवालीले अब पूर्णकालीन सीईओको रूपमा बैंकको व्यवस्थापन सम्हाल्ने भएका छन्।
ज्ञवाली यसअघि नविल बैंकमै वरिष्ठ नायव प्रमुख कार्यकारी अधिकृत पदमा कार्यरत थिए। त्यसअघि उनले ज्योति विकास बैंकको सीईओ को रूपमा जिम्मेवारी सम्हालेका थिए। बैंकिङ क्षेत्रका अनुभवी व्यवस्थापकका रूपमा परिचित ज्ञवाली चार्टर्ड एकाउन्टेन्ट समेत हुन्।
उनको नेतृत्वमा नविल बैंकले अझ प्रभावकारी रूपमा डिजिटल बैंकिङ, लगानी विस्तार, तथा ग्राहक–मैत्री सेवा प्रवाहमा सुधार गर्ने अपेक्षा गरिएको छ। बैंकिङ क्षेत्रका विश्लेषकहरूले ज्ञवालीको बहुआयामिक अनुभव र समर्पण बैंकको दीर्घकालीन रणनीति सफल बनाउन सहायक हुने विश्वास व्यक्त गरेका छन्।
