काठमाडौं — कर्णाली विकास बैंकमा २ अर्ब ५० करोड रुपैयाँभन्दा बढीको हिनामिना प्रकरणमा बैंकका संस्थापक अध्यक्ष तथा तत्कालीन प्रमुख कार्यकारी अधिकृत (सिईओ) राजेन्द्रवीर राय पक्राउ परेका छन्।
नेपाल प्रहरीको केन्द्रीय अनुसन्धान ब्यूरो (सीआईबी)ले शनिबार रुपन्देहीको बेलहिया क्षेत्रबाट रायलाई पक्राउ गरेको हो। बैंकिङ कसुर तथा सजाय ऐनअन्तर्गत उनीमाथि अनुसन्धान सुरु गरिएको सीआईबीले जनाएको छ।
२०६० सालमा स्थापना भएको कर्णाली विकास बैंकका संस्थापक अध्यक्ष रहेका राय विक्रम सम्वत २०७६ देखि २०७९ सम्म सिईओको जिम्मेवारीमा थिए। उनी विभिन्न अवधिमा सञ्चालक समितिको अध्यक्षको भूमिकामा पनि क्रियाशील थिए।
सीआईबीका अनुसार यस प्रकरणमा पूर्व सिईओ दिनेशकुमार रावत, पूर्व वित्त विभाग प्रमुख वेदप्रकाश ठकुरी, र हालका सिईओ तथा वित्त प्रमुख निरजविक्रम शाहसमेत अनुसन्धानको घेरामा परेका छन्।
प्रहरीले प्रारम्भिक अनुसन्धानका क्रममा बैंकमा बिनाधितो, नियमविपरीत र सम्बन्धित निकायको अनुमतिबिनै करोडौं रुपैयाँका ऋण प्रवाह, खातामा अनियमित लेनदेन, आन्तरिक लेखापरीक्षणमा हेरफेर, लगायतका विषयमा गम्भीर आर्थिक अनियमितता भएको आशंका गरेको छ।
सीआईबीले अनुसन्धानलाई तीव्र बनाउँदै थप दोषीको पहिचान र कारबाहीको प्रक्रिया अगाडि बढाउने जनाएको छ।
