दोर्दी खोला जलविद्युत कम्पनी लिमिटेडको हकप्रद सेयरमा आवेदन दिन आज (आइतबार) अन्तिम अवसर रहेको छ। कम्पनीले गत चैत १९ गतेदेखि वैशाख ८ गतेसम्म पहिलो चरणमा हकप्रद सेयर निष्कासन गरे पनि केही सेयरधनीहरूले हक प्रयोग नगरेकाले वैशाख १२ गतेदेखि फेरि आवेदन खुला गरिएको हो।
कम्पनीले हकप्रद सेयर निष्कासनका लागि फागुन १५ गते बुक क्लोज गरेको थियो। त्यसैले फागुन १४ गतेसम्म नेप्सेमा कारोबार भई कायम भएका सेयरधनीहरूले मात्र हकप्रद सेयरमा आवेदन दिन सक्नेछन्।
लगानीकर्ताहरूले सानिमा बैंकका प्रमुख शाखा कार्यालयहरू — विराटनगर, वीरगञ्ज, पोखरा, बुटवल, नेपालगञ्ज, वीरेन्द्रनगर, धनगढी, लमजुङ — साथै सानिमा क्यापिटलको नक्सालस्थित कार्यालय र नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाहरूबाट आवेदन दिन सक्नेछन्। साथै, सीडीएससीको “मेरो सेयर” प्रणालीमार्फत अनलाइनबाट पनि सहजै आवेदन दिन सकिन्छ।
दोर्दी खोलाले हाल कायम चुक्तापूँजी १ अर्ब ५ करोड ४२ लाख ६० हजार ४ सय रुपैयाँको १ः१ अनुपातमा रु. १०० अंकित दरका १ करोड ५ लाख ४२ हजार ६०४ कित्ता हकप्रद सेयर निष्कासन गरेको हो।
