काठमाडौं – बलेफी हाईड्रोपावर लिमिटेडको लक–इन अवधि आजदेखि समाप्त भएको छ। कम्पनीको कुल १ करोड ६५ लाख २४ हजार ४८९ कित्ता सेयर अब दोस्रो बजारमा खरिदबिक्रीका लागि उपलब्ध हुने भएका छन्।
कम्पनीले जानकारी दिएअनुसार आजदेखि संस्थापक सेयर, स्थानीय बासिन्दालाई बाँडफाँड गरिएको सेयर तथा कर्मचारीका लागि सुरक्षित गरिएको सेयरको लक–इन अवधि सकिएको हो।
लक–इन अवधि समाप्त भएका सेयरमध्ये १ करोड ४६ लाख २३ हजार ७६० कित्ता संस्थापक सेयर, १८ लाख २७ हजार ९७० कित्ता स्थानीय बासिन्दाको सेयर तथा ७३ हजार ११९ कित्ता कर्मचारीका लागि बाँडफाँड गरिएको सेयर रहेका छन्।
बलेफी हाइड्रोपावरले स्थानीय बासिन्दाका लागि २०७८ माघ २७ गतेदेखि फागुन २६ गतेसम्म आईपीओ निष्कासन गरेको थियो भने आम सर्वसाधारण तथा कर्मचारीका लागि २०७८ चैत १६ देखि २१ गतेसम्म आईपीओ खुलाएको थियो। उक्त आईपीओको बाँडफाँड २०७८ चैत २९ गते गरिएको थियो।
धितोपत्र बोर्डको नियमन अनुसार संस्थापक, स्थानीय तथा कर्मचारीलाई बाँडफाँड गरिएको सेयर कम्तीमा तीन वर्षको लागि लक–इनमा राख्नु पर्ने प्रावधान छ। सोही प्रावधान अनुसार आज लक–इन अवधि समाप्त भएको हो।
यद्यपि, कम्पनीका सञ्चालक सदस्य तथा उच्च पदस्थ कर्मचारीहरूले भने पदमा रहँदासम्म र पदबाट हटेको एक वर्षसम्म आफ्ना सेयर बिक्री गर्न नपाउने व्यवस्था कायमै छ।
अब लक–इन अवधि समाप्त भएपछि बलेफी हाइड्रोपावरका १.६५ करोडभन्दा बढी कित्ता सेयरहरू बजारमा सक्रिय हुने सम्भावना बढेको छ, जसले दोस्रो बजारमा सेयरको आपूर्ति तथा मूल्यमा समेत प्रभाव पार्न सक्ने देखिन्छ।
