अमेरिकी राष्ट्रपति डोनाल्ड ट्रम्पले चीनमाथि थप ५० प्रतिशत भन्सार शुल्क लगाउने निर्णय गरेका छन्, जससँगै चिनियाँ सामानमाथि लगाइने कुल अमेरिकी ट्यारिफ १०४ प्रतिशत पुगेको छ। ह्वाइट हाउसद्वारा सोमबार सार्वजनिक गरिएको आधिकारिक दस्तावेजमा यस निर्णयको पुष्टि गरिएको छ।
ह्वाइट हाउसको विज्ञप्तिमा उल्लेख गरिएको छ, “चीनले अमेरिकाविरुद्ध प्रतिशोधात्मक कदम चाल्ने घोषणा गरेपछि राष्ट्रपति ट्रम्पले यो निर्णायक कारबाही गर्नुभएको हो।”
ट्रम्पले आफ्नो दोस्रो कार्यकालको सुरुमा नै चीनमाथि २० प्रतिशत आयात शुल्क लगाएका थिए। त्यसपछि विश्वव्यापी ट्यारिफ रणनीतिअन्तर्गत चीनमा थप ३४ प्रतिशत शुल्क थपिएको थियो। अहिले थप ५० प्रतिशत भन्सार लगाइएपछि चीनबाट अमेरिका पुग्ने वस्तुमा कुल १०४ प्रतिशत शुल्क लाग्नेछ।
ट्रम्पले केही दिन अघि चेतावनी दिएका थिए कि, “यदि चीनले अमेरिकी उत्पादनमा लगाइएको आयात शुल्क फिर्ता नलिए थप ५० प्रतिशत ट्यारिफ लगाइनेछ।” चीनले यस निर्णयलाई “ब्ल्याकमेल” को संज्ञा दिँदै यसको कडा विरोध जनाएको छ। चीनको वाणिज्य मन्त्रालयले एक वक्तव्य जारी गर्दै भनेको छ, “चीन अमेरिकी दबाब स्वीकार्दैन र अन्तिमसम्म यसको विरोध गर्नेछ।”
यो कदमले दुई विश्वशक्ति बीचको व्यापार युद्धलाई थप चर्काउने देखिएको छ, जसको असर विश्व अर्थतन्त्रमा समेत पर्न सक्ने अड्कल गरिँदैछ।
