काठमाडौं । युनाइटेड अजोड इन्स्योरेन्स कम्पनी लिमिटेडको २ लाख ५६ हजार ३१० कित्ता संस्थापक सेयर बिक्रीमा राखिएको छ। कम्पनीका संस्थापक सेयरधनी सन्दिप खेतान, जुलि चाचान, महेन्द्र कुमार गोयल र ज्योति कुमार सरावगीको स्वामित्वमा रहेका यी सेयरहरू बिक्रीका लागि खुला गरिएको हो।
सन्दिप खेतानको ९९ हजार ४११ कित्ता सेयरको न्यूनतम मूल्य प्रतिकित्ता १८० रुपैयाँ, जुलि चाचानको ४९ हजार ७०५ कित्ताको मूल्य १८० रुपैयाँ, महेन्द्र कुमार गोयलको ८२ हजार ५९२ कित्ताको मूल्य १६३.९० रुपैयाँ तथा ज्योति कुमार सरावगीको २४ हजार ६०२ कित्ताको मूल्य १६३.५० रुपैयाँ निर्धारण गरिएको छ।
यस सेयर खरिदका लागि कम्पनीका जोसुकै व्यक्ति वा कम्पनीले आवेदन दिन सक्नेछन्। यसअघि माघ ३० गते ३५ दिने सूचना जारी गरी यी सेयरहरू कम्पनीका विद्यमान संस्थापक सेयरधनीहरूका लागि बिक्रीमा राखिएको थियो। तर निर्धारित समयभित्र कुनै आवेदन नपरेकाले अब सर्वसाधारणका लागि बिक्री गर्न लागिएको कम्पनीले जनाएको छ।
सेयर खरिद गर्न इच्छुक लगानीकर्ताले सूचना प्रकाशित भएको १५ दिनभित्र आवेदन दिनुपर्नेछ। आवेदन दिन काठमाण्डूको सुन्धारामा रहेको कम्पनीको केन्द्रीय कार्यालयमा जानुपर्नेछ। आवेदन दिँदा आफूले खरिद गर्न चाहेको सेयर संख्या स्पष्ट रूपमा खुलाउनु पर्नेछ।
