नेपालबाट दैनिक ४ सय मेगावाट विद्युत भारत निर्यात हुन सुरु भएको छ । बर्षाको कारण बिजुली उत्पादन बढ्न थालेपछि भारततर्फ पुनः विद्युत् निर्यात सुरु हुने क्रम सुरु भएको हो ।
देशभित्र खपत गरेर बाँकी रहेको विद्युत् जेठ १४ गते बाट भारतीय ऊर्जा एक्सचेन्ज (आइएक्स) मार्केटमा प्रतिस्पर्धी दरमा बिक्री सुरु गरिएको हो ।
प्राधिकरणका अनुसार खोला तथा नदीमा पानीको बहाब बढेसँगै प्राधिकरण, प्राधिकरणका सहायक कम्पनीहरू र निजी क्षेत्रका स्वामित्वमा रहेका जलविद्युत् आयोजनामा विद्युत् उत्पादन वृद्धि भएर आन्तरिक माग पूरा भएपछि अतिरिक्त विद्युत् निर्यात सुरु गरिएको हो ।
हालसम्म नेपालका १५ वटा जलविद्युत् आयोजनाहरूबाट उत्पादित ६५६ मेगावाट विद्युत् प्रतिस्पर्धी बजारमा निर्यातका लागि केन्द्रीय विद्युत् प्राधिकरणले स्वीकृति दिएको छ ।
