नबिल बैंकका डेपुटी सीईओ मनोज ज्ञवालीले कुनै बैंकले प्रवाह गरेको खराब कर्जामा परिणत भए र ऋण असुलीको क्रममा धितोले नखाम्दा मुद्दा चलाउँदै जाने हो भने कुनै पनि बैंकर जेल बाहिर नहुने बताएका छन् ।
तत्कालीन सेञ्चुरी बैंकका पूर्व सीईओ र सीईओसहित १० जना पक्राउ परेपछि ज्ञवालीले सामाजिक सञ्जालमार्फत सामान्य बैंकिङ अभ्यास नबुझी कुनै पेशाकर्मीलाई दु:ख दिनु गलत भएको उल्लेख गरेका छन् ।
‘कुनै बैंकले प्रवाह गरेको कर्जा खराब कर्जामा परिणत भयो र ऋण असुलीको क्रममा धितोले खामेन भने बैंकिङ कसुर लगाउने अनि रिस्क म्यानेजमेन्ट (आरएम)देखि सीईओ/बोर्ड सम्मलाई हत्कडी लगाउने हो भने छ महिना मात्र कर्पोरेट/इन्फ्रामा कर्जा दिन बसेका कुनै बैंकर जेल बाहिर हुँदैनन्’ ज्ञवालीले लेखेका छन्, ‘जसलाई मन लाग्छ, एक हप्ता फाइल खोजेर टप्प टिपेर जेल हाले हुन्छ ।’
कर्जा प्रवाह गर्दा व्यक्तिगत लाभ हुने र बैंकलाई नोक्सानी हुने गरी बेइमानी गर्ने बैंकरलाई नागरिकको पैसामा बदमासी गरेको अपराध मा हदैसम्मको कारबाही हुनुपर्ने भए पनि सामान्य बैकिङ अभ्याससम्म नबुझि कुनै पेशाकर्मीलाई दुःख दिनु गलत भएको उनको भनाइ छ ।
‘रिसिवी साध्न, दुःख दिने नियतले गरिएको कर्म हो वा बैंकिङ नबुझि गरेको काम हो भने म खेद प्रकट गर्छु । जहाँसम्म तुलसीराम गौतम जस्ता बैंकरले बदमासी गरेको चार्ज बैंकिङ सेक्टरलाई पत्याउन मुस्किल छ,’ उनले लेखेका छन्, ‘अरु बैंकरहरुका बारेमा म जानकार हुन सकिन । तर मनोज, दिपेश र राजेशले घुस खाए, बेइमानी गरे भनेर पत्याउन म सक्दिँन ।’
उनले यसअघि बैंक अफ काडमाडौंका सीईओलाई यसै दुःख दिइएको बताएका छन् ।
‘बदमासी छैन भने साथीहरुले उन्मुक्ति पाउँछन् नै तर यसका लागि पनि सेटिङ कति मिलाउनु पर्ने हो ? उनीहरुले भोगेको मानसिक तनावको क्षतिपूर्ति कसरी हुन्छ ? के बैंकहरुले अब रियलेस्टेट र घर कर्जा वा मार्जिन लैण्डिंग मात्र गर्ने हो? धेरै प्रश्न आइरहे’ उनले भनेका छन् ।
‘घर कर्जा, व्यक्तिगत कर्जा, रियलस्टेट कर्जा प्रवाह गर्दा घर जग्गा धितो मूल्यांकन गराई धितो को ५०% देखि ७०% सम्म दिन मिल्ने तर व्यवसायिक कर्जा/ कर्पोरेट कर्जा/ इन्फ्रास्ट्रक्चर कर्जा प्रवाह गर्दा स्टक रिसिभल र परियोजनको लागतको आधारमा प्रवाह गर्न मिल्दछ, यस्तो कर्जामा धितो भनेको उक्त परियोजना , स्टक र रिसिभल मात्रै पनि हुन सक्दछ । संसारभरको बैंकिङ प्राक्टिस यही हो’ उनले भनेका छन् ।
