गणपति लघुवित्त वित्तीय संस्था लिमिटेडले अघिल्लो आवको तुलनामा आफ्नो वित्तीय प्रदर्शनमा उल्लेखनीय सुधार ल्याउँदै गत आवको चौथो त्रैमाससम्म ४ करोड २५ लाख रुपैयाँको खुद नाफा आर्जन गरेको छ। अघिल्लो आवमा १ करोड ५२ लाख रुपैयाँ नाफा कमाएको संस्थाले यो वर्ष १७९.४९ प्रतिशतले नाफा वृद्धि गर्न सफल भएको हो।
संस्थाको खुद ब्याज आम्दानी ४१.७१ प्रतिशतले बढेर १७ करोड २७ लाख रुपैयाँ पुगेको छ। यद्यपि, खुद शुल्क तथा कमिशन आम्दानी भने घटेर ८ लाख ४१ हजार रुपैयाँमा सीमित भएको छ, जुन अघिल्लो आवमा ६२ लाख ६१ हजार रुपैयाँ थियो। कुल सञ्चालन आम्दानी १९ करोड ८७ लाख रुपैयाँ रहेको छ भने सञ्चालन मुनाफा ६ करोड ७ लाख रुपैयाँ पुगेको छ।
संस्थाले ५० करोड ३७ लाख रुपैयाँबराबरको निक्षेप संकलन गरेको छ भने कर्जा प्रवाह २ अर्ब ५ करोडबाट बढेर २ अर्ब २९ करोड रुपैयाँ पुगेको छ। अघिल्लो आवमा ऋणात्मक रहेको रिटेन्ड अर्निङ (१५ लाख ३५ हजार घाटा) अहिले २ करोड ६४ लाख रुपैयाँले धनात्मक बनेको छ। रिजर्भ कोष ९ करोड ९ लाख रुपैयाँमा पुगेको छ भने वितरणयोग्य मुनाफा पनि २ करोड ६४ लाख रुपैयाँ कायम भएको छ।
खास कुरा के भने, संस्थाको खराब कर्जा अनुपात (NPL) ५.८४ प्रतिशतबाट घटेर ४.५१ प्रतिशतमा झरेको छ, जसले संस्थाको कर्जासम्बन्धी जोखिम नियन्त्रणमा आएको देखाउँछ।
समीक्षा अवधिसम्म प्रतिसेयर आम्दानी (EPS) २८.०४ रुपैयाँ, प्रति सेयर नेटवर्थ १७७.४५ रुपैयाँ, प्रति सेयर सम्पत्तिको मूल्य १ हजार ७६०.३६ रुपैयाँ, मूल्य आम्दानी अनुपात (P/E ratio) ५८.६६ गुणा र तरलता अनुपात ११.७९ प्रतिशत रहेको छ।
गणपति लघुवित्तको यो वित्तीय सुधारले संस्थाको स्थायित्व र लगानीकर्ताको विश्वासमा सकारात्मक प्रभाव पार्ने अपेक्षा गरिएको छ।
