अर्थमन्त्री डा.प्रकाशशरण महतले अवैध कारोबारको ओसार पसार गर्नेविरुद्ध उजुरी दिनेलाई पुरस्कार दिने व्यवस्था गरेकाले त्रिभुवन विमानस्थल भन्सार कार्यालयबाट एक क्विन्टल अवैध सुन समातिएको दाबी गरेका छन् । प्रेस युनियन रुपन्देहीले बुटबलमा गरेको पत्रकार भेटघाट कार्यक्रममा बोल्दै महतले यस्तो दाबी गरेका हुन् ।
उनले भने, ‘भन्सारमा कतिपय अनियमित कुरा निस्तेज गर्नका लागि पुरस्कारको व्यवस्था गरेको छु, सूचना दिनेलाई यो व्यवस्था बीचमा हटेको थियो, मलाई लाग्छ त्यसले पनि यो सूचना प्राप्त गरी पक्राउ गर्न मद्दत पुग्यो भन्ने मलाई लाग्छ। जुन प्रकरण उजागर भएको छ त्यसको जरै सम्म पुगेर अनुसन्धान प्रक्रिया अघि बढेको छ । सुचनाको आधारमा सुन र तस्करलाई पक्राउ गरियो । उनीहरुले सुनलाई बाहिर लान पाएन । त्यो कुरो त राम्रो होनी फेरि ।’
