बैंकहरुले रु. २० लाखसम्म कर्जा कृषि प्रयोजनका लागि मोटर बाटो नभएको जग्गा धितो राखी प्रवाह गर्न पाउने भएका छन्।
नेपाल राष्ट्र बैंकले वित्तीय चेतनाका लागि आज जारी गरेको सूचनामा यसबारेमा जानकारी दिइएको हो। बैंक तथा वित्तीय सुंस्थाहरुले प्रदान गर्ने कृषि कर्जामा वास्तविक किसानको पहुँच सुनिश्चित गर्ने उद्देश्यले यस्तो व्यवस्था गरिएको राष्ट्र बैंकले जनाएको छ।
बैंक तथा वित्तीय संस्थाको शाखाले यस प्रकारको कर्जासम्बन्धी निवेदन प्राप्त भएको ७ कार्यदिनभित्र स्वीकृत गर्नुपर्ने राष्ट्र बैंकले जनाएको छ। स्वीकृत हुन नसक्ने भएमा सोको स्पष्ट कारणसमेत उल्लेख गरेर ] सम्बन्धित ग्राहकलाई लिखित रुपमा प्रस्ट पार्नु पर्ने छ ।
खाद्यान्न उत्पादन, पशुपन्छी तथा मत्स्यपालनजस्ता कार्यका लागि रु. २० लाखसम्मका कर्जा प्रवाह गर्दा मोटर बाटो नभएको खेतीयोग्य जमिनलाई पनि बैंक तथा वित्तीय संस्थाले धितोका रुपमा स्वीकार गर्न सक्ने व्यवस्था राष्ट्र बैंकले गरेको हो ।
यस निर्देशनको पालना नभएमा राष्ट्र बैंक वा सम्बन्धित बैंकको गुनासो शाखामा गुनासो राख्न पाइनेछ ।
